من فعالية ( فنجال قهوة عالماشي )

 

  مدخل ،

نعم .. تلك السعادة التي كنت عليها و أنا أتصفح الإقلاع .. تحديداً في صندوق رسائلي الخاص .. فأنا العضو الملقب بـ شطيط ( والتبن  ) .. أقر و أعترف بكامل قواي العقلية بأنه قد وصلتني رساله من جهة إعلامية تطلب عقد لقاء تلفزيوني معي على أحد القنوات .. ما أصدددددق  .. بالله واحد يلفعني بأسطوانة غاز أو يمحطني بسلك مسجل عشان أقتنع .. أخييييراً أنعطيت وجه يا ناااس  .. يا سلااااااام .. ما أجمل أن توثق مصالتك بعيداً عن عالم الزرف و إغتصاب الحقوق الفكريه ( الله من زين الفكر عشان توثق حقوقك له   ) … هذا العالم الوهمي القذر الواطي المخيس السافل الحقير المسمى بعالم النت <<< قام يرفس المودم من الغبنه   !!

احتشدت العائلة الكريمة حول الكمبيوتر و لزقوا وجيهم عالشاشه و السعابيل تقوطر حتى غرق الكيبورد !! .. عندها أخذت أختي الصغيرة تطامر و هي تقول بأسارير مبتهجة: هيييييييييييه هييييه .. اخوي شطيط بيطلع في برنامج ( الجانب المظلم ) .. من قدنااا !! .. لم تكد تكمل طمرتها الثانية حتى صفقت براسها الجدار قائلاً: يا السبهه بيستضيفوني انا .. مهوب سعد خضر  !! .. رجعت إلى الكمبيوتر و إذا بأخي الصغير فاقن أثمه على صور الفيس بوك  !! .. فتداركت براءته و أطفأت الجهاز درءاً لوقوع أخي في الإنحراف المبكر خصوصاً انه ينام معي في نفس الغرفه   .. إلا أنه ما زال فاقن أثمه على الشاشه حتى والكمبيوتر طافي  .. فحملت الكمبيوتر و خبأته في درج الكمدينة تاركاً المركه التي كنت أضع عليها الكمبيوتر أمامه  !!

 

و في الأثناء .. صدر صوت تغرة عنيف من الدور الأول .. فأنطلقوا أخوتي إلى الدرج قائلين بسعادة عامرة: أبوي جاااا .. أبوي جااا !! <<< انا خبري الأباء إذا دخلوا بيوتهم ينعرفون بأصوات أكياس أو مفاتيح أو حتى الأبو يصرخ بصوت عالي يقول ( أي أم هوووم ) … الا الوالد ما نعرف انه وصل للبيت الا بصوت تغرته .. عائله يرثى لها قسم بالله   

 

و بعد أن تأكد كل فرد من عائلتي بحقيقة المقابلة .. أرتسمت إبتسامة الحنان الصافي على شفاة أمي الحنون وهي تقول: و أنا أمك إذا سألوك وش سر نجاحك .. قل لهم من مطازيز أمي .. ولا تنسى بعد تقول لهم عن الدعاوي اللي أدعيها لك إذا كبيت الزباله  !! .. فأستطردت مسلكاً: ايه إن شاء الله .. ابشري يا أم الكاتب الكبير الدكتور شطيط ( الظاهر اني تأثرت بهياط ليلى الهلالي  ) !! .. عندها وضعت أختي الصغيره يديها على خصرها و أخذت تهزه بلعانه قائله: لااااااااااء .. نسيت من يولع لك الخزان وانت تصارخ في الحمام ما فيه مويه  .. نسيت جملة ( أخوي يقول انه مهوب فيه ) اللي دايم أقولها لأصدقائك  .. ولا ما تدري أن وراء كل هذا وشسمه .. أخت مدري وش !! .. فرديت عليها غاضباً: اقول وراء ما تاكلين تبن .. ولتس عين تتكلمين انتي و قش المكيف الصحراوي اللي على راستس .. لا و حاطه ثلاث شباصات يعني اني شعري الطويل يطيح على عيني و يضايقني .. اصلن من دخلتي المدرسة و حنا نرتز من مراقدنا الفجر من صجة صوت المشط وهو يمشي على شعرتس الخشن  !! ..

 

و فجأه أقترب صوت التغرة فأيقنت بأن أبي قريب من غرفتي .. حتى دخل و أحتضن أختي الصغيرة ( مع مراعاة أخذ المسافة بين شعرها وثوبه عشان ما يتشقق  ) ثم قال: كلششش ولا بنتي عاااد .. الا وش هالحركات يا شطيط .. قالوا لي أخوانك انك بتطلع في التلفزيون .. بس الله يرضى لي عليك .. لا تنسى تقول للمخرج يحط مسافة بين الشريط اللي بيحطه على عيونك و بين حواجبك عشان ما نلخبط خخخخخخ !! .. نظرت إليه شزرا ثم تغصبت مصالته قائلاً بإستهزاء: والله جينات الحواجب ما جبتها من برا .. بعدين قالوا لك بطلع في برنامج ( دمعة تائب ) أو ( العائدون إلى الحق ) عشان يحطون شريط على عيني  ؟؟ .. فأستطرد أبي بمصالته للمره الثانيه متسائلاً: عاد انت عائد له هالحين خخخخخخ .. المهم بس إذا سألوك عن الأسباب اللي وصلتك للنجومية .. قل لهم من توجيهات أبوي الرشيدة .. و انت عاد شف كم محطة بالعقال وجهتك بها  !! .. لم يكد ينهي حديثه حتى رجف أختي عالجدار قائلاً: يالله .. انا داخل انوم لا تصجوني !!

 

أنطلقت لخزانة ملابسي لألبس ما يليق لهذه المناسبة النادرة .. ولكن ما إن فتحت الخزانة حتى وقعت في حيرة من أمري .. ياربي البس ثوب الدفه ذو الياقه المتهردلة ولا بدلة المعهد المهني حقت ولد خالتي  .. فقررت أن البس ثوب الدفة .. تخبرون مناسبة رسمية .. صعبه أجي ببدلة  <<< ولا بعد ناوي  ؟؟؟

 

و بعد أن لبست الثوب و صفطت كمومه عشان أخفي وصاخة خشمي .. نزلت للمطبخ أبحث عن شماغي اللي أخذته الوالده قبل شهر عشان تمسح به تطريش أختي .. فوجدته و نقعته بكلوروكس و تنر ثم لبسته .. و هكذا أصبحت في أبهى حلتي و على إستعداد تام لإجراء أي مقابلة حتى وإن كان برنامج العبده أوبرا !! <<< وااثق للنعله  !!

 

ودعت أهلي مؤكداً عليهم أن يبقوا قريبين من التلفاز ليشهدوا هذا الحدث التاريخي .. فهممت بالخروج و لكن إلتصاق الثوب أخذ يضايقني و يعيقني عن المشي .. فلم أجد حلاً سوى أن أدعك ثوبي بشعر أختي عوضاً عن الفضفاض .. وبالفعل نجحت العملية .. و خرجت متوجهاً إلى إستديو التصوير   !!

 

السلام عليكم و رحمة الله و بركاته .. أعزائي المشاهدين و المشاهدات .. مرحباً بكم في برنامج ( 95 ) مع محدثكم صلاح .. حلقتنا لهذا اليوم مع كاتب إجتاحت شهرته الأفق في عالم الشبكة العنكبوتية حتى أصبح حديث المجتمع و رمز المصالة و إلهام التقيؤ و طموح كل عانس .. ضيفنا لهذا اليوم هو الكاتب الساخر الماصل الكبير ( شطيط )  << انواع التناقض   !!

 

المذيع: مرحباً بك أخوي شطيط في برنامجك ( 95 ) !!

 

شطيط وهو يسكر الياقة ثم يدير وجهه بحذر كي لا تخرب الكوبرا قائلاً: الله يحييك أخوي صلاح .. الا ما قلت لي .. هالحين 95 قبل إختبار قياس ولا بعد خخخخخخخخخ !! .. طيب أدبي ولا علمي خخخخخخخخخخخ !!

 

قطع المذيع قهقهتي قائلاً: أعزائي المشاهدين سنعود إليكم بعد الفاصل .. كونوا بالجوار  !! .. فأدار بوجهه العابس نحوي قائلاً: عسى ما شر يابو ؟ .. وش هالمصالة ؟ .. لي ساعه أمدح فيك و أريش بك .. اخرتها تتميصل بهالكلام … اقول اترك عنك المصالة لا أطردك برا الإستديو   !!

 

المذيع بعد أن عدل شخصيتة و أدار بخشته نحو الكاميرا: عودة من بعد الفاصل و ننتقل لضيفنا العزيز شطيط … أخ شطيط .. ما تعليقك على تدافع المعجبين و المعجبات نحوك بشكل مستفز و مزعج ؟

 

شطيط وهو يطلق تنهيدة عميقة: اييييييييييه يا صلاح .. بصراحه حطيت وجهك المربع على الجرح بهالسؤال .. فعلاً أنا أعاني معاناة شديدة من المعجبين و خصوصاً المعجبات .. ياخي حتى المنتدى إذا دخلته يهنق معي ولا أقدر أسوي تحديث من كثر النوافذ اللي تقول " لديك رسالة خاصة   "  .. و أنا واثق بعد هاللقاء ما راح أرتاح حتى في الشارع و الأماكن العامة .. لذلك ذكرني و حنا طالعين أكلم وزارة الداخلية يصرفون لي أربع فرق من مكافحة الشغب لأني راح أكون مصدر تجمعات متنقل !! <<< وش عنده أستاد الملك فهد  

 

أخذ المذيع يقلب في الأوراق ثم أردف قائلاً: وصلنا فاكس من المدعو ( ز. ر. ع. ) يقـ .. وهنا قاطعت المذيع بمصالتي المعهودة قائلاً: هههههههههههه زرع أجل .. الظاهر شاق ورقة هالفاكس من كتاب قراءة إبتدائي.. الله يستر لا يجينا بعد شوي فاكس من ( ح. ص. د. ) خخخخخخخخ .. أدري انك كاتم الضحكه و ما تقدر تقاوم ذباتي عشان سير المقابلة يمشي .. لذلك بسكت و بخليك تكمل بكل أريحية .. ايوة أسلم  <<< الا اشوا انك لحقت عليه قبل لا يعلن الفاصل و يمحطك بالمكرفون اللي معه   !!

 

المذيع وهو يتنفس الصعداء من مصالة الضيف: الفاكس يقول انه شخص يعرفك زين و معجب بنزاهتك و كرمك و قوة إيمانك حتى أنه أستشهد بموقفك اللي في جامع الراجحي .. لما تبرعت بجوائز مسابقة تحفيظ القرأن الكريم و شاركت بالأنشطة الدينية بما فيها خطبة الجمعة .. صحيح هالكلام ؟؟

 

شطيط: هاه .. ايه صح بصراحه كانت أيام فله ( امحق رد   ) .. الواحد وش يبي من هالدنيا غير الأجر و طبعاً الدنيا فانية و الإنسان معها بعد .. يعني بيخليها تنفني لحالها بدون محرم .. اكيد بيخاويها ولا مهوب رجال <<< أقول يا زينك في الفاصل بس  !!

 

المذيع وهو يطرق برأسه موضحاً: أهاا .. بس انا لاحظت في أخر الفاكس مكتوب جملة صغيرة تقول ( تراني نصاب و اللي قلته كله من تأليفي بس عشان أحرج ضيفكم الماااااصل ) .. ما تعليقك ؟؟

 

شطيط و العرق يتصبصب من خشمه: ومن قال جامع الراجحي اصلن  .. أنا اقصد جامع الشميسي … يعني من جدك بتبرع للراجحي و انا لو أبيع نفسي ما جبت قيمة صرّاف من صرّافاته خخخخخخخخخ .. يا صلاح تكفى أمسك نفسك .. لا تضحك .. ورانا مقابله نبي نخلصها على خير   !!

 

المذيع وهو يصرّ على أسنانه و يعفط ورقة الفاكس مفروساً من مصالة الضيف: طيب من بعد أذن ضيفنا .. راح نستقبل المكالمات الهاتفية على الرقم الموضح أسفل الشاشه و معانا إتصال .. الو .. من معي ؟

 

وفي هذه اللحظه , سمعت صوت تمخيش و إحتكاك شعر بسماعة الهاتف .. عندها أدركت هوية المتصل قائلاً: يا هلا وغلا بأختي الصغيرة .. يا هلا بالحلوه الأموره .. شربتي كاس الحليب اللي حطيته لك عالأبجورة يا قلبي .. ترى لو ما شربتيه أزعل منك ولا أشتري لك عروسة زي كل يوم    !!

أختي وهي تربط شعرها بجنزير سيكل: تكلمني ؟  

 

شطيط: ايه انتي يا شطورة يا دلبووووش .. ولا نسيتي أخوكي اللي كل يوم يوديكي للملاهي و يشتري لك إإإيسكريم <<< يا مصلي وانا كني فؤاد بخش  

 

أختي: اقول اسكت تكفى لا أطرش على أذنك  .. بعدين غرييييييييييبة  .. ما قد وديتني معك الا لمشاوير تعبية الغاز .. لا و  تسوي سحب و قرعه بيني وبين أخواني عشان هالمشوار اللي طول الطريق و أسطوانات الغاز تتدربى علينا و تكسر عظامنا في صندوق ددسنك  .. حتى البقاله إذا وقفنا عندها بالغلط تقول لي أجلسي في السيارة انا بشتري لتس .. أخرتها ترجع لي بمعمول أبو نص و تجحدني و تاكله لحالك  !!

 

المذيع: شكراً لكي على هذه المداخلة والظاهر ان ضيفنا سوى نفسه نايم بعد تعليقك  .. لذلك نستقبل إتصال أخر من أحد المعجبات .. الو .. هلا أختي !! <<< أنقذني جزاه الله خير    !!

 

تغلغل صوت أنثوي لاذع داخل طبلة أذني حتى أشذف مسامعنا بعذوبة صوته و رقة حنجرته هامساً: وااااااااي صدددددددمه  .. وش ذا المقشع اللي جالس  !! .. فقاطعتها بصوت عالي وأنا أنغز رجل المذيع: الظاهر ان الإتصال يقطع .. الصوت مهوب واضح ولا أخوي صالح  ؟؟ .. فرد المذيع بإستقعاد: بالعكس واضح جداً.. حتى بالأماره كانت تقول عنك "وش ذا المقشع اللي جالس "  .. تفضلي اختي كملي !! .. فأردفت الفتاة اللعينه قائله: أسمح لي يا شطيط بس يرحم والديك لا تتعدا الكيبورد تكفى .. يا ناس قبييييييييييح .. خشم و حواجب وععععععععععع .. بصراحه أول ما شفت وجهك اللي كله شعر قلت هذا المفروض يلبسونه عمامة و يستضيفونه في قناة المنار الشيعيه .. ياربيه شين قسم بالله  .. صدق ان النت عالم حقير .. وانا اللي كنت أرسم عليك و أقول هذا فتى أحلامي .. بس بعد اللي شفته بشخمممممط عليك و بكتب على خشتك ( تااااااااالف ) يا كلــ .. طووووط طووووط !!

 

المذيع: شكراً أختي و أنا بصراحه ما ألومك بس يا ليت لو ترتقين بأسلوبك شوي ( بدري !! ) .. ناخذ إتصال أخير .. الو .. تفضل أخوي ؟

 

عبيد: صححح يا أبو خشم .. من بعد الجلسة على عتبة باب بيتكم صرت تطلع في التلفزيون  !!

 

شطيط: هلااااااا والله بصديقي الحبيب و فتى حارتي البار … وينك يا غالي .. حي الورود ما عاد يسوى من دونك   !!

 

عبيد: وش حي وروده يابو  .. نسيت اننا ساكنين في العريجاء .. حي وايتات الشفط والبيوت الملزقه ههههههههه

 

شطيط وهو يغمز لعبيد من زود الثوارة: يا حبك للمزح يا عبيد .. من عقب كشتتنا في جزر المالديف وانت صاير تنسى كثير ها ها ها !! <<< ضحكة ذوات   !!

 

عبيد: وراك تكلمني بفوقية كذا ( أموت و أعرف من وين جاب هالكلمه ؟  ) .. بعدين وش مالديفه اللي كاشتين فيها .. نسيت طلعاتنا لمخطط الغروب لا و نجلس على وطايات موتري بعد ههههههه .. عموماً أنا سعيد جداً اني شفتك في التلفزيون يابو خشم .. الله يالدنيااا .. اللي يشوفك الأن ما يقول هذا البزر اللي كان ينتهز فرصة أن أمه تغير له حفاظته ثمن يركض مفصخ للشارع و أمه تصارخ تناديه عند الباب  .. المصيبه اني ذاك اليوم اسألك عن السبب تقول لي: ياخي إحساس رائع ان الهواء يصفق مقفاك بعد إختناق يوم كامل بالحفاظه هههههههههه .. وش تحس به تكفى على هالمصالة هههههههه .. انا مدري ليه معطينك وجه في هالمقابله مع أني أنا و العيال في الحارة ما نقدر نتحمل مصالتك دقيقه على بعضها   !!

 

المذيع مقاطعاً وهو يناظر الساعة: شكراً لك أخ عبيد على إتصالك … بصراحه وقت البرنامج شارف على الإنتهاء و كان ودنا الفرصة تسمح لنا و نتقرب أكثر من ضيفنا الماصل .. لذا أعزائي المشاهدين .. نختم و إياكم حلقتنا لهذا اليوم مع كلمه أخيرة لضيفنا العزيز .. تفضل أخوي ( شطيط ) !!

 

شطيط حاط يده على راسه في لحظة إنهيار مدوية: وش نستمع يا رجال   .. قفل الشـّاره بس .. انا تمرمطت في هالمقابلة من الكل حتى منك  .. الا ورا ما تمنعون البث المباشر و تخلون اللقاء تسجيل عشان يمدينا نحذف .. وش زود القنوات السعودية عنكم !!

 

بينما و أنا أناشق و أجتر الكلمات اجترارا .. إذ بالمذيع يربت على كتفي بيده و يمسح دمعي بيده الأخرى مواسياً: إرضاء الناس غاية لا تدرك و أنا أخوك .. و صدقني إذا الناس كلها أجتمعت على مدحك فأعرف انك فاشل !!

 

أومأت برأسي إيجاباً ثم نهضت في خطى متثاقلة و قوى متخاذلة أجر أذيال الخيبة والتحطيم .. عندها أستوقفني صوت تغرة خالطتها ضحكات تردد صداها أرجاء الأستديو .. فألتفت بذهول وإذا بأبي فاقن كشرته مع الطاقم يضحكون على دلاختي !! .. عندها نطق أبي مستطرداً: حسبي الله عليه من مقلب .. كاتم تغرتي من أول البرنامج ولا طاع يخلص .. وجهي صار أزرق خخخخخخخخخ !! .. حينها قطع تغرات أبي قدوم شخص يرتدي بالطو أبيض و نظارة طبية قائلاً لي وهو يثبت نظارته: معك الدكتور محمد .. دكتور أمراض نفسية و عصبية .. ادري انك حاس بالقهر .. و أتمنى أنك تعذرنا لكن هالمقلب كان عبارة عن علاج نفسي لمرضك بعد متابعة ست شهور لحالتك النفسية أكتشفنا من خلالها انك ترسل لنفسك رسايل إعجاب بيوزرات وهمية في المنتدى .. حتى رسالة المقابلة .. عقلك الباطن هو اللي خلاك ترسلها لنفسك بدون ما تستشعر هوية المرسل .. و طبعاً احنا بدورنا أستغلينا هالرساله و نفذناها عشان نحقق لك التصادم بين أوهامك اللي تمجد نفسك فيها و بين واقعك الماصل .. لذلك أشكرك على تجاوبك للعلاج و أحب أطمنك ان محد يدري عن سالفة مرضك الا أنا و أبوك بس .. حتى أهلك كل اللي يعرفونه انه مقلب عادي مدبر من أبوك !! .. عندها تدخل أبي قائلاً: و أنا أبوك انا بس حبيت أعلمك حقيقة هالإنترنت اللي مشغلك عن أهلك و أخوانك بالساعات .. حتى الغداء نحطه و ينشال وانت جالس عالكمبيوتر و كل ما ناديناك تقول ( يالله جاي جاي ) و تسحب علينا .. يعنبو بليسك صرنا نكتب لك معروض عشان تروح تشتري خبز .. اقول بس قوه معي للبيت خن نكمل ضحك عليك مع أهلك يا الماصل المريض خخخخخخخ  <<< أمحق أبو  .. بس ما لاحظتوا انه تكلم كلام طويل بدون ما يحط فواصل لتغاره  !!

 

و بعد أن وصلنا إلى البيت و تمزعت بطون أهلي من الضحك علي بإستثناء أخي الذي لم أره .. فبحثت عنه و إذا به لا يزال فاقن أثمه أمام المركة إلا اني لاحظت وجود مراكي صغار جنبه  <<< الظاهر ان مفعول الفيس بوك أشتغل   !!

 

و عندما جن الليل و أرخى سدوله .. أخذت أتقلب على فراشي محاولاً نسيان ما حدث ولكن لم تطفىء نار حقدي على أبي بعد .. لذا توجهت إلى الوالدة و مسكتها على جنب قائلاً بكل مكيدة: ما شاء الله على أبوي يمه .. تصدقين طلع فاهم في الكمبيوتر يوم انه يرسل لي رسالة المقلب عالمنتدى .. لا و يقول لي انه عضو فعال و له معجبات يسولف معهم بمكرفون و كاميرا الكمبيوتر  .. أجل ما قال لتس هالكلام  .. أوه معليش أحسبه معلمتس  .. يالله اجل انا طالع أنام .. فمان الله    !!

 

أخذ الشك يساور الوالدة و الأفكار تاخذها و تجيبها حتى لحظة وصول أبي للبيت .. و بعد برهه .. خرجت من غرفتي لأتحقق ما جرى من مستجدات .. و إذا بأبي نايم في الصالة ببطانيته و مخدته و يتمتم بتذمر .. عندها لم أستطع الإمتناع من إيقاظ أهلي للضحك عليه حد الثمالة .. فالسن بالسن والعين بالعين و الشايب هو الأظلم  !! 

 

 
تنويه هام: أنا ضد الظهور الإعلامي .. يعني لا تتعبون أنفسكم في طلبات المقابلة معي <<< لا تكفى وافق 

 

مخرج ،

لازم  ؟